BREAKING;Magufuli aahirisha sherehe za Desemba 9 - MWANAHARAKATI MZALENDO ™

Breaking

Tuesday, November 20, 2018

BREAKING;Magufuli aahirisha sherehe za Desemba 9


Dar es Salaam. Rais John Magufuli ameahirisha maadhimisho ya sherehe za uhuru zinazofanyika Desemba 9 kila mwaka na kuagiza fedha zilizotengwa zielekezwe kujenga hospitali jijini Dodoma itakayoitwa Hospitali ya Uhuru.


Taarifa iliyotolewa leo Jumanne, Novemba 20, 2018 na Waziri Mkuu Kassim Majaliwa, imesema Rais Magufuli ameagiza Sh995.182 milioni zilizokuwa zimetengwa kwa ajili ya kufanikisha sherehe hizo zitumike kwa ajili ya ujenzi wa hospitali hiyo.
Waziri Mkuu ametoa taarifa hiyo wakati alipokutana na viongozi waandamizi wa mkoa wa Lindi leo Jumanne pamoja na wilaya zake katika kikao cha maandalizi ya shughuli za kuzima Mwenge kilichofanyika katika ukumbi wa mikutano ofisi wa Mkuu wa Mkoa wa Lindi.


Amesema hospitali hiyo itakayojengwa katika eneo la kati ya barabara ya kwenda Hombolo na Chamwino  kwenye barabara ya kwenda Dar es Salaam itakuwa inawahudumia wakazi wa mkoa wa Dodoma pamoja na wananchi wengine watakaokuwa  mkoani humo.
Kadhalika, waziri mkuu amesema Rais Magufuli amewaagiza wakuu wa mikoa na wilaya kuandaa matukio watakayoyatekeleza katika maeneo yao yatakayoashiria maadhimisho ya Siku ya Uhuru.


“Wanaweza kutumia siku hiyo kufanya usafi maeneo ya wazi au kwenye hospitali,” amesema Majaliwa
Kutokana  na maagizo hayo, Majaliwa amewataka wananchi katika maeneo yote nchini kujiandaa kufanya shughuli za kijamii zitakazopangwa na wakuu wao wa mikoa na wilaya.
Hii ni mara ya pili kwa Dk Magufuli kuahirisha sherehe za uhuru. Mara ya kwanza ilikuwa mwaka 2015 alipoagiza fedha zilizotengwa zitumike kupanua kipande cha barabara kutoka Morocco hadi makutano ya Mwenge jijini Dar es Salaam.
Loading...

No comments: