WAZIRI UMMY AWAONGOZA WATUMISHI WA SEKTA YA AFYA KATIKA ZOEZI LA UPANDAJI MITI. - MWANAHARAKATI MZALENDO ™

Breaking

Saturday, February 9, 2019

WAZIRI UMMY AWAONGOZA WATUMISHI WA SEKTA YA AFYA KATIKA ZOEZI LA UPANDAJI MITI.




Waziri wa Afya, Maendeleo ya Jamii, Jinsia, Wazee na Watoto Mhe.Ummy Mwalimu akimwagilia maji mti wake aliopand a, wakati  wa zoezi la upandaji miti lililo fanywa na Watumishi wa Wizara ya Afya katika mji wa Serikali ulio kata ya Mtumba jijini Dodoma.Picha na WAMJW
Waziri wa Afya, Maendeleo ya Jamii, Jinsia, Wazee na Watoto Mhe.Ummy Mwalimu leo amewaongoza Watumishi wa Wizara ya Afya katika zoezi la upandaji miti katika mji mpya wa Serikali ulio katika kata ya  Mtumba, tarafa ya Kikombo Jijini Dodoma.

Katika zoezi hilo Waziri Ummy ameagiza Watumishi wote waliohusika katika upandaji wa miti hiyo kuhakikisha wanaitunza vizuri isitawi, na ameagiza kila mtu kuchukua jukumu hilo.

"Hii miti ambayo tumeipanda sio tu miti ya kivuli na mapambo tu, bali imejumuisha miti ya matunda. Miti hii ambayo tunaipanda ili ikue na kustawi, lazima kila mtu, ambae amepanda mti wake kuhakikisha kwamba haufi" Anasema Waziri Ummy.

Mbali na hayo, Waziri Ummy amemwagiza Katibu Mkuu Wizara ya Afya Dkt. Zainab Chaula kutenga maeneo kwa ajili ya Watumishi kufanya mazoezi ikiwa ni mpango wa Serikali ya awamu ya Tano kupambana na Magonjwa yasiyo yakuambukiza.

"Mazingira ya hapa ni mazuri kweli kutembea, ukizunguka huu mji hukosi Kilomita 5, nitamwandikia Waziri  Jenister atusaidie kuwa na mabafu kwa ajili ya watu wanaofanya mazoezi kubadilisha nguo jioni, ni lazima sehemu za kazi ziwe rafiki kwa watu kufanya mazoezi" anasema Waziri Ummy.

Kwa upande mwingine, Waziri Ummy amempongeza Katibu Mkuu Wizara ya Afya, Maendeleo ya Jamii, Jinsia, Wazee na Watoto Dkt. Zainab Chaula na kikundi chake kwa kuja na wazo la upandaji wa miti katika mji huo, na kuwa mfano wa kuigwa na Wizara nyingine.

Katika zoezi hilo lililojumuisha viongozi mbalimbali wa wizara, jumla ya miti 470 imepandwa katika awamu ya kwanza, lengo ikiwa ni kupanda miti 525. Miti 320 iliyopandwa ni ya matunda, na mingine ni kwa ajili ya mapambo na kivuli.




Loading...

No comments: