Waziri Mkuu wa Bangladesh, Sheikh Hasina, amejiuzulu na kukimbia nchi baada ya shinikizo kutoka kwa waandamanaji vijana waliokuwa wakimtaka aondoke madarakani. Hasina, ambaye ameiongoza Bangladesh tangu mwaka 2009, aliondoka mji mkuu wa Dhaka kwa helikopta akiwa na dada yake, na sasa yuko njiani kuelekea mji wa Agartala nchini India.
Ripoti zinaeleza kuwa Waziri Mkuu huyo mwenye umri wa miaka 76, alikimbia baada ya maandamano makubwa yaliyokuwa yakiendelea nchini humo. Maandamano hayo yamesababisha amri ya kutotoka nje kwa muda usiojulikana kote Bangladesh huku kukiwa na hofu ya kutokea kwa ghasia zaidi.
Hasina amekuwa mkaidi, akiendelea kushutumu wachochezi kama “magaidi.” Waziri wa Sheria, Anisul Huq, aliviambia vyombo vya habari kuwa wito wa kumtaka Hasina ajiuzulu “haufai” na kwamba waandamanaji walikuwa wakijibu “kihisia.”
Licha ya shinikizo hilo, Hasina alikuwa amejitolea kuketi na kuzungumza na viongozi wa waandamanaji, lakini walikataa ombi hilo. Ukaidi wake umeibua wasiwasi kuwa anaweza kusababisha umwagaji damu zaidi kabla ya kuachia madaraka.
Sheikh Hasina, binti wa rais mwanzilishi wa Bangladesh, ndiye mwanamke mkuu wa serikali aliyekaa muda mrefu zaidi duniani. Miaka yake 15 madarakani imejawa na shutuma za kutoweka kwa watu, mauaji ya nje ya mahakama, na kukandamiza wapinzani na wakosoaji wake, madai ambayo ameyakanusha mara kwa mara. Serikali yake pia imekuwa ikishutumu vyama vikuu vya upinzani kwa kuchochea maandamano.
Tangu aingie madarakani baada ya ushindi wa utata katika uchaguzi wa Januari, Hasina amekutana na changamoto nyingi, na sasa kujiuzulu kwake kunafungua ukurasa mpya katika historia ya kisiasa ya Bangladesh.
#KonceptTvUpdates
