Tanzania inatarajiwa kuwa mwenyeji wa Jukwaa la Ununuzi wa Umma la Afrika Mashariki, ambalo litafanyika kuanzia Septemba 9 hadi 12, 2024, jijini Arusha. Mkurugenzi wa Mamlaka ya Udhibiti wa Ununuzi wa Umma (PPRA), Dennis Simba, amethibitisha kuwa Rais wa Jamhuri ya Muungano wa Tanzania, Dkt. Samia Suluhu Hassan, atakuwa mgeni rasmi katika ufunguzi wa jukwaa hilo na atazindua Mfumo wa Ununuzi wa Umma wa Kielektroniki (NeST).
Simba, akizungumza na waandishi wa habari wakati wa kilele cha maonesho ya Nanenane jijini Dodoma, alieleza kuwa jukwaa hili ni tukio muhimu linalowaleta pamoja wadau wa ununuzi wa umma kutoka Afrika Mashariki. “Tanzania imepata nafasi hii mara ya nne, na tunajivunia kuandaa tukio hili ambalo linatoa fursa kwa sekta za umma na binafsi kubadilishana maarifa na uzoefu,” alisema Simba.
Washiriki wapatao 1,000 wanatarajiwa kuhudhuria jukwaa hili, wakiwemo wawakilishi kutoka Tanzania, Kenya, Uganda, Burundi, Rwanda, Sudani Kusini, Somalia, na DRC. Washiriki hawa wanatoka sekta mbalimbali kama vile sekta ya umma, sekta binafsi, mashirika ya kitaaluma, na asasi za kiraia.
Simba alifafanua kuwa jukwaa hilo litakuwa na umuhimu mkubwa katika kuboresha ushirikiano na ubadilishanaji wa maarifa kati ya nchi wanachama wa Afrika Mashariki. “Lengo ni kuleta maendeleo endelevu katika sekta ya ununuzi wa umma, na kuimarisha uchumi wa nchi zetu kwa ujumla,” aliongeza Simba.
Jukwaa hili litachangia pia kuimarisha uwazi na uwajibikaji katika ununuzi wa umma, huku likitoa fursa kwa washiriki kujadili changamoto na mafanikio katika sekta hiyo. Simba alisisitiza kuwa, “Tukio hili ni jukwaa muhimu la kujenga uelewa, kuboresha mifumo ya kitaasisi, na kuimarisha ushirikiano kati ya wadau wa ununuzi wa umma.”
Kongamano hili litafungwa rasmi mnamo Septemba 12, 2024, na Waziri Mkuu Kassim Majaliwa. Hii inatarajiwa kuwa hatua muhimu katika kuboresha sekta ya ununuzi wa umma nchini Tanzania na Afrika Mashariki kwa ujumla.
#KonceptTvUpdates
