Benki Kuu ya Libya imetangaza kusitisha shughuli zake zote hadi pale Mkurugenzi wa Idara ya Teknolojia ya Habari wa benki hiyo, Musab Msallem, atakaporejeshwa salama baada ya kutekwa nyara na watu wasiojulikana.
Msallem alitekwa nyara siku ya Jumapili akiwa nyumbani kwake, tukio ambalo limezua wasiwasi mkubwa na kuhusishwa na tishio la usalama kwa wafanyakazi wengine wa benki hiyo. Kufuatia utekaji nyara huo, Benki Kuu ya Libya imechukua hatua kali kwa kusimamisha huduma zake zote, ikiwa ni pamoja na shughuli za kibenki na miamala ya kifedha, hadi pale Msallem atakapopatikana.
Tukio hili la utekaji nyara limejiri wiki moja baada ya watu wenye silaha kuizingira benki hiyo na kumlazimisha Gavana wa Benki Kuu, Seddik al-Kabir, kujiuzulu. Al-Kabir amekuwa akikosolewa vikali kutokana na usimamizi wake tangu alipoteuliwa kushika wadhifa huo mwaka 2012. Hali ya sintofahamu iliyozunguka benki hiyo imezua maswali mengi kuhusu usalama wa taasisi hiyo ya kifedha na mustakabali wake.
Wachambuzi wa masuala ya usalama na uchumi wamesema kuwa hatua ya benki hiyo kusitisha shughuli zake inaweza kuwa na athari kubwa kwa uchumi wa Libya, ambao tayari unakabiliwa na changamoto nyingi kutokana na hali ya kisiasa isiyotabirika. Wameongeza kuwa utekaji nyara huu unaweza kuongeza hofu na wasiwasi miongoni mwa watumishi wa umma na wafanyabiashara, hali inayoweza kudhoofisha zaidi uchumi wa taifa hilo.
Hadi sasa, hakuna kundi lililojitokeza kudai kuhusika na utekaji nyara huo, na polisi pamoja na vikosi vya usalama vinaendelea na uchunguzi wa tukio hilo. Serikali ya Libya imelaani vikali utekaji nyara huo na kuahidi kufanya kila juhudi kuhakikisha Msallem anapatikana na wahusika wanachukuliwa hatua za kisheria.
Benki Kuu ya Libya imekuwa katika hali ya mvutano wa kisiasa na kiusalama kwa muda mrefu, huku masuala ya usimamizi na uongozi yakiibua migogoro ya mara kwa mara. Tukio hili la karibuni linaongeza ukubwa wa changamoto zinazolikabili taifa hilo lenye utajiri wa mafuta lakini linalokabiliwa na mgogoro wa kiusalama na kisiasa kwa miaka mingi.
#KonceptTvUpdates
