Mwenyekiti wa Chama cha Demokrasia na Maendeleo (CHADEMA), Freeman Mbowe, ameibua maswali mazito kuhusu ongezeko la matukio ya utekaji wa viongozi na wananchi mbalimbali nchini Tanzania. Akizungumza na wanahabari mapema leo jijini Dar es Salaam, Mbowe alidai kuwa vitendo hivi vimeendelea kuongezeka, huku vyombo vya usalama vikilaumiwa kwa kukaa kimya na kutokuchukua hatua za kisheria dhidi ya matukio hayo.
“Ndani ya nchi yetu kumeendelea kuwa na wimbi kubwa la viongozi mbalimbali wa nchi yetu, Watanzania wengine wasiokuwa na vyama na wa sehemu ya vyama vya siasa wanaendelea kutekwa, na vyombo vya usalama vya nchi yetu vimeendelea kukaa kimya kuwateka watu katika taratibu ambazo sio za kisheria,” alisema Mbowe kwa msisitizo.
Mbowe alitaja kuwa matukio haya yamezua hofu na mashaka miongoni mwa wananchi, hususan wale wanaojihusisha na siasa au wanapinga sera za serikali kwa njia mbalimbali. Alieleza kuwa hali hii ni kinyume na misingi ya haki za binadamu na utawala wa sheria, huku akiwataka viongozi wa serikali na vyombo vya usalama kuchukua hatua za haraka ili kukomesha vitendo hivi.
Mwenyekiti huyo wa CHADEMA aliendelea kusema kuwa chama chake kimepokea malalamiko mengi kutoka kwa familia za watu waliotekwa, na aliitaka serikali kutoa majibu na kuchukua hatua stahiki ili kuhakikisha usalama wa raia wote unadumishwa.
“Tunaitaka serikali kutoa maelezo ya kina juu ya matukio haya na kuchukua hatua za haraka kuhakikisha kuwa raia wote wanaishi kwa usalama bila hofu ya kutekwa,” aliongeza Mbowe.
Matamshi haya ya Mbowe yanakuja wakati ambapo kumekuwa na malalamiko kutoka kwa baadhi ya wananchi na wanaharakati kuhusu ongezeko la matukio ya utekaji na kutoweka kwa watu bila taarifa rasmi. Wakosoaji wa serikali wamekuwa wakilalamika kuwa hatua hizi zinakiuka haki za kimsingi za raia na zinarejesha nyuma juhudi za kuimarisha demokrasia nchini.
Serikali, kwa upande wake, bado haijatoa tamko rasmi kuhusu madai haya, na hatua zaidi zinatarajiwa kutoka kwa vyombo vya usalama ili kutoa ufafanuzi wa hali hii. Wakati huo huo, mashirika ya haki za binadamu yameendelea kutoa wito kwa serikali kuhakikisha kuwa haki za kisheria za raia zinaheshimiwa na kudumishwa.
#KonceptTvUpdates
