Mahakama ya Haki ya Ulaya (ECJ) imeiamuru kampuni ya Apple kulipa €13bn (£11bn; $14bn) kwa serikali ya Ireland, ikiwa ni kodi ambayo haikulipwa. Tume ya Umoja wa Ulaya ilishutumu Ireland kwa kuipa Apple faida za kikodi zisizo halali, jambo lililosababisha kuibuka kwa mgogoro wa kisheria uliodumu kwa miaka minane.
Mwaka 2016, Tume ya Umoja wa Ulaya iligundua kuwa Apple ilifaidika na punguzo kubwa la kodi kupitia mpango wa kodi wa Ireland, hali ambayo ilikiuka sheria za ushindani za Umoja wa Ulaya. Hata hivyo, serikali ya Ireland ilipinga mara kadhaa hitaji hilo, ikisisitiza kuwa mpangilio wake wa kodi ulikuwa halali na wa haki.
Mahakama ya Haki ya Ulaya imetoa uamuzi wa mwisho, ikithibitisha kuwa Ireland iliipa Apple msaada wa kikodi usio halali. “Ireland inapaswa kulipwa kodi hiyo iliyokwepwa, kwa mujibu wa sheria za Umoja wa Ulaya,” mahakama hiyo ilisema katika uamuzi wake.
Licha ya juhudi za serikali ya Ireland kutetea mpango wake wa kodi, uamuzi huo una maana kubwa kwa kampuni za kimataifa zinazotumia mbinu za kuepuka kodi. Kwa Apple, uamuzi huu ni changamoto kubwa, ukija muda mfupi baada ya kampuni hiyo kuzindua simu mpya aina ya iPhone 16, huku ikiendelea kukabiliwa na changamoto za kisheria duniani kote.
#KonceptTvUpdates
