Jumuiya ya Umoja wa Ulaya, pamoja na Mabalozi wa Nchi Wanachama wa Umoja wa Ulaya nchini Tanzania, na Mabalozi wa Uingereza, Canada, Norway, na Uswisi, wameeleza kusikitishwa kwao na matukio ya hivi karibuni ya ukatili, kupotea kwa watu, na vifo vya wanaharakati wa kisiasa na haki za binadamu nchini Tanzania. Tamko la pamoja lililotolewa siku ya Jumanne, tarehe 10 Septemba 2024, limeeleza wazi wasiwasi wao kuhusu hali ya haki za binadamu na usalama nchini.
Mabalozi hao wametoa wito kwa serikali ya Tanzania kuhakikisha uchunguzi wa kina unafanyika kuhusu matukio hayo, huku wakitoa pole kwa familia zote zilizoathirika. Wameeleza kuwa matukio haya yanaathiri misingi ya demokrasia na haki za wananchi, na hivyo yanahitaji hatua madhubuti ili kubaini wahusika na kuhakikisha uwajibikaji.
Katika tamko lao, mabalozi hao wameunga mkono ahadi ya Rais Samia Suluhu Hassan kupitia mpango wake wa ‘4R’, ambao unalenga kuhakikisha haki za msingi za wananchi na uhuru wa kujieleza vinaheshimiwa. “Tunaunga mkono ahadi ya Rais Samia Suluhu kupitia mpango wake wa ‘4R’, wa kuhakikisha haki za msingi za wananchi na uhuru wa kujieleza unalindwa,” wamesema.
Wamehimiza pia Rais Samia kuanzisha uchunguzi wa haraka ili kuwabaini wahusika wa vitendo vya ukatili na kuhakikisha kwamba kuna uwajibikaji wa dhati. Mabalozi hao wameeleza kuwa matukio haya yanaweza kuathiri sana uhusiano wa kimataifa wa Tanzania, hasa kama haki haitatendeka.
Kwa kumalizia, wameeleza kuwa wako tayari kushirikiana na serikali ya Tanzania katika kuhakikisha amani na utulivu vinaendelea kudumu. “Pamoja na kuunga mkono juhudi za serikali, tunasisitiza kuungana na Watanzania katika kulinda amani na utulivu wa nchi,” wameeleza mabalozi hao katika tamko lao.
#KonceptTvUpdates
